2Pe 1 | BOJ | STEP | E Saimon Pita. E Yesus Kristus aqa wau tamo. A na e qariŋbej deqa e aqa anjam marsim laqnum. Kristus a gago Qotei. A na iga padalo sawaq dena eleŋej. Niŋgi ti iga ti gago areqalo qujai. Agi iga kalil Yesus qa gago areqalo siŋgilateqnum. Yesus Kristus a kumbra tiŋtiŋ yeqnu qaji tamo. Aqa kumbra dena niŋgi a qa nuŋgo areqalo siŋgilateqnub. Agi iga a qa gago areqalo siŋgilateqnum dego kere.

2 Peter 1

1 E Saimon Pita. E Yesus Kristus aqa wau tamo. A na e qariŋbej deqa e aqa anjam marsim laqnum. Kristus a gago Qotei. A na iga padalo sawaq dena eleŋej. Niŋgi ti iga ti gago areqalo qujai. Agi iga kalil Yesus qa gago areqalo siŋgilateqnum. Yesus Kristus a kumbra tiŋtiŋ yeqnu qaji tamo. Aqa kumbra dena niŋgi a qa nuŋgo areqalo siŋgilateqnub. Agi iga a qa gago areqalo siŋgilateqnum dego kere. 2 Niŋgi Qotei wo gago Tamo Koba Yesus wo naŋgi qa bole qalieonub. Deqa Qotei a niŋgi qa are tulaŋ boleiyimqa niŋgi geregere lawo na soqniye.

Qotei a nami niŋgi giltŋgosiq metŋgej deqa niŋgi aqa segi tamo uŋgasari tiŋtiŋ unub

3 Yesus Kristus a segi Qotei. A siŋgila koba ti unu. Aqa siŋgila dena a na gago ŋambile siŋgilatetgwajqa deqa marsiq iŋgi iŋgi tulaŋ boledamu iga egej. Aqa kumbra dena a na iga aqaryaigej deqa iga Qotei aqa kumbra geregere dauryeqnum. Iga Kristus qa bole qalieonum deqa iga kumbra degyeqnum. Aqa segi ñam koba na ti aqa siŋgila na ti aqa kumbra bole na ti a na iga metgej. 4 Osiqa laŋ goge qaji iŋgi bole bole kalil a nami iga egwa marej qaji di iga egej. Are prugwajqa kumbra mandamq endi tulaŋ koba unu. Kumbra dena iga ugeugeigeqnu. Ariya Kristus a na laŋ goge qaji iŋgi bole bole di iga egej. Aqa kumbra dena a na niŋgi aqaryaiŋgimqa niŋgi kumbra uge uge kalil di uratosib ŋambile osib Qotei aqa segi kumbra bole ti soqniye.

5 Niŋgi deqa are qaloqnsib kumbra bole bole yqajqa siŋgilaoqnsib dena nuŋgo areqalo Kristus qa bole siŋgilatoqniye. Osib dena niŋgi Qotei qa bole qalieosib soqniye. 6 Osib dena niŋgi nuŋgo jejamu aqa kumbra geregere taqatesoqniye. Osib dena niŋgi gulube qoboiyoqnsib siŋgila na tigelesoqniye. Osib dena niŋgi Qotei aqa segi kumbra boleq di sosib walweloqniye. 7 Osib dena niŋgi nuŋgo Kristen was qu naŋgi kadoinjrsib geregereinjroqniye. Osib dena niŋgi qalaqalaiyo kumbra dauryosib soqniye.

8 Niŋgi gago Tamo Koba Yesus Kristus qa bole qalieonub deqa kumbra kalil deqaji nuŋgoq di sosim kobaqujaosim tulaŋ siŋgilaqas di nuŋgo qalie di loumqa keresai. A nuŋgoq di tulaŋ siŋgilaesosim gei gargekoba ateleŋqas. 9 Ariya kumbra bole deqaji tamo bei aqaq di sqasai di a tamo ŋam qandimo bul sqas. Deqa iŋgi bole bole isaq di unu qaji di a unqa keresai. Bole, Qotei a nami aqa une kobotetej. Ariya a deqa olo are walyeqnu. 10 O was qu, Qotei a nami niŋgi giltŋgosiq metŋgej deqa niŋgi aqa segi tamo tiŋtiŋ sqajqa siŋgilaoqniye. Niŋgi degyqab di niŋgi uloŋqa keresai. 11 Qotei na gam waqtetŋgimqa niŋgi laŋ qureq oqibqa gago Tamo Koba Yesus Kristus agi iga eleŋej qaji a nuŋgo Mandor Koba sosim niŋgi taqatŋgimqa niŋgi so bole gaigai sqab.

12 Bole, niŋgi ijo anjam bole di qalieonub deqa agi niŋgi siŋgila na ojejunub. Ariya niŋgi anjam deqa olo are walŋgaim deqa e bati gaigai niŋgi olo merŋgwajqa are qaleqnum. 13 E mandamq endi sosiy nuŋgo areqalo tigeltetŋgitqa niŋgi ijo anjam deqa olo are qalqajqa deqa e niŋgi merŋgonum. E are qalonum, ijo kumbra di bole. 14 E qalieonum, sokiñala e ijo jejamu uratosiy moiqai. Gago Tamo Koba Yesus Kristus a na e degsi merbej. 15 Deqa e siŋgila na anjam di niŋgi geregere merŋgoqnqai. Yim bunuqna e moiitqa niŋgi ijo anjam deqa gaigai are qaloqnsib sqab.

Qotei a na Kristus ñam kobaquja yosiqa aqa segi riaŋ aqaq di atej

16 Iga nami gago Tamo Koba Yesus Kristus aqa siŋgila qa ti aqa bqajqa bati qa ti niŋgi merŋgeqnam niŋgi quoqneb. Ariya iga Kristus aqa anjam di merŋgoqnsim bati deqa iga mandam tamo naŋgo sa anjam dauryosaioqnem. Iga gago segi ŋamdamu na Yesus aqa riaŋ ti aqa siŋgila ti unsim deqa niŋgi merŋgoqnem. 17 Abu Qotei a na Yesus ñam kobaquja yosiqa aqa segi riaŋ aqaq di atej. Qotei a segi laŋ qaji riaŋq di sosiqa Yesus qa endegsi marej, “Endi ijo Aŋgro e na tulaŋ qalaqalaiyeqnum qaji. E a qa tulaŋ areboleboleibeqnu.” 18 Iga Qotei aqa mana goge dia Yesus ombla sonamqa bati deqa Qotei a laŋ qureq di sosiqa anjam di marnaq iga quem. 19 Deqa iga bole qalieonum, Qotei aqa medabu o qaji tamo naŋgi nami anjam maroqneb di naŋgi anjam bole maroqneb. Deqa niŋgi dego naŋgo anjam di torei ojiye. Niŋgi ojqab di bolequja. Naŋgo anjam di waŋal bul sawa ambruq di puloŋesosiqa nebe qa burbas oqeqnu dego kere nuŋgo are miligiq di suwaŋejunu.

20 Ariya anjam kobaquja bei endi e na merŋgit niŋgi qalieoiye. Iga gago segi areqalo dauryosim Qotei aqa medabu o qaji tamo naŋgo anjam nami neŋgreŋq di so qaji di aqa utru laŋa palontqasai. 21 Di kiyaqa? Naŋgo anjam maroqneb qaji di mandam tamo naŋgo areqalo na marosaioqneb. Mondor Bole a na naŋgo areqalo tigeltetnjreqnaqa naŋgi Qotei aqa medabu oqnsib anjam maroqneb.